ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦਾ ਪਹਿਲਾ ਪ੍ਰਕਾਸ਼

ਜਿਸ ਵਕਤ ਸਾਹਿਬ ਇਹ ਪਹਿਲਾ ਪ੍ਰਕਾਸ਼ ਕਰਦੇ ਹਨ, ਗੁਰੂ ਅਰਜਨ ਪਾਤਸ਼ਾਹ ਉਸ ਵੇਲੇ ਕਿਹੜੀ ਲੀਲ੍ਹਾ ਰਚਦੇ ਹਨ। ਜਿਸ ਵਕਤ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਨੂੰ ਦਰਬਾਰ ਸਾਹਿਬ ਪ੍ਰਕਾਸ਼ ਕੀਤਾ ਹੈ ਉਸ ਵਕਤ ਪੰਜਵੇਂ ਗੁਰੂ ਨਾਨਕ ਆਪਣਾ ਆਸਣ, ਸੁੱਖ ਆਸਣ ਛੱਡ ਦਿੰਦੇ ਹਨ, ਆਪ ਸਾਹਿਬ ਫਰਸ਼ ਤੇ ਹੋ ਜਾਂਦੇ ਹਨ। ਸੰਗਤ ਦੇ ਨਾਲ ਹੀ ਫਰਸ਼ ਤੇ ਬੈਠਦੇ ਹਨ। ਜਿਸ ਵਕਤ ਸ਼ਾਮ ਨੂੰ ਸੁਖਆਸਣ ਦਾ ਵਕਤ ਆਇਆ, ਬਾਬਾ ਬੁੱਢਾ ਜੀ ਨੇ ਪੁੱਛਿਆ ਕਿ ਗਰੀਬ ਨਿਵਾਜ਼ ਸਾਹਿਬ ਵਾਸਤੇ ਨਵਾਂ ਪਲੰਘ, ਫੁਰਮਾਇਆ ਨਹੀਂ ਬਾਬਾ ਬੁੱਢਾ ਜੀ ਸਾਡੇ ਹੀ ਪਲੰਘ ਤੇ ਨਵੀਂ ਵਿਛਾਈ ਕਰ ਦਿਓ। ਨਵੀਂ ਵਿਛਾਈ ਕਰ ਦਿੱਤੀ ਗਈ। ਪਹਿਲੇ ਸਾਹਿਬ ਨੇ ਆਪਣਾ ਆਸਣ ਛੱਡਿਆ ਫਿਰ ਸੁਖਆਸਣ ਛੱਡਿਆ ਫਿਰ ਫਰਸ਼ ਤੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਚਰਨਾਂ ਵਿੱਚ ਆਪਣਾ ਸਭ ਕੁੱਝ (ਆਰਾਮ ਸੁੱਖ) ਤਿਆਗ ਦਿੱਤਾ। ਸਾਹਿਬ ਦੇ ਚਰਨਾਂ ਵਿੱਚ ਹੀ ਰਹੇ, ਫਿਰ ਥੋੜ੍ਹੀ ਦੇਰ ਬਾਅਦ ਹੀ ਮਹਾਨ ਬਲੀਦਾਨ ਦੇ ਦਿੱਤਾ।

ਸੱਚੇ ਪਾਤਸ਼ਾਹ ਇਹ ਤੀਜੇ ਪਾਤਸ਼ਾਹ ਗੁਰੂ ਅਮਰਦਾਸ ਜੀ ਅਰਦਾਸ ਕਰਦੇ ਹਨ ਅਤੇ ਪੰਜਵੇ ਸਰੂਪ, ਗੁਰੂ ਅਰਜਨ ਪਾਤਸ਼ਾਹ ਦੇ ਸਰੂਪ ਵਿੱਚ, ਉਹ ਸਾਰੇ ਜਗਤ ਉਸ ਸੜਦੇ ਬਲਦੇ ਸੰਸਾਰ ਦੀ ਸਾਰੀ ਜਲਨ ਆਪਣੇ ਉੱਪਰ ਲੈ ਕੇ ਅੱਗ ਵਿੱਚ ਆਸਣ ਲਾ ਲੈਂਦੇ ਹਨ।

ਬਾਬਾ ਨੰਦ ਸਿੰਘ ਸਾਹਿਬ ਨੇ ਫੁਰਮਾਇਆ-

ਉਸ ਦੇ ਅਵਤਾਰ ਧਾਰਨ ਦਾ, ਵਡਾ ਕਾਰਨ ਇਹ ਹੈ,

ਸਾਹਿਬ ਨੇ ਮਹਾਨ ਬਲੀਦਾਨ ਦੇ ਦਿੱਤਾ ਕਿਹਦੇ ਵਾਸਤੇ? ਇਸ ਜਗਤ ਵਾਸਤੇ, ਸਾਡੇ ਵਾਸਤੇ। ਸਾਹਿਬ ਨੇ ਆਪਣਾ ਸਭ ਕੁੱਝ ਸਮਰਪਨ ਕਰ ਦਿੱਤਾ। ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਚਰਨਾਂ ਵਿੱਚ ਸਭ ਕੁੱਝ ਸਮਰਪਨ ਕਰਕੇ ਆਪ ਤੇ ਉਸੇ ਵੇਲੇ ਲਾਂਭ੍ਹੇ ਖੜ੍ਹੇ ਹੋ ਗਏ, ਉਸੇ ਵੇਲੇ ਪਹਿਲੇ ਪ੍ਰਕਾਸ਼ ਦੇ ਦਿਨ ਹੀ ਸਾਰੀ ਮਨੁੱਖਤਾ ਦਾ ਮੁੱਖ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵੱਲ ਕਰ ਰਹੇ ਹਨ।

ਗੁਰੂ ਨਾਨਕ ਦਾਤਾ ਬਖਸ਼ ਲੈ।।
ਬਾਬਾ ਨਾਨਕ ਬਖਸ਼ ਲੈ ।।